शीझान खानला ४ दिवसांची पोलीस कोठडी
टीव्ही अभिनेत्री तुनिषा शर्माचा सहकलाकार शीझान मोहम्मद खान याला मुंबईतील वसई न्यायालयाने २५ डिसेंबर रोजी चार दिवसांची पोलीस कोठडी सुनावली आहे. पोलिसांनी भारतीय दंड संहितेच्या (आयपीसी) कलम ३०६ (आत्महत्येसाठी प्रवृत्त करणे) शीझानला अटक केली होती. आज वसई कोर्टापुढे शीझानला हजर करण्यात आलेले, त्यानंतर न्यायालयाने हा महत्त्वाचा निर्णय सुनावला आहे. यानंतर शीझानला वाळीव पोलीस ठाण्यात नेण्यात आले. या दरम्यान त्याचे काही फोटो समोर आलेत, ज्यात तो तोंड लपवताना दिसतो आहे.
तुनिषाच्या आईने केले गंभीर आरोप
दरम्यान शीझानला पोलीस कोठडीत पाठवण्यात आल्यानंतर त्याच्या वकिलांनी अशी प्रतिक्रिया दिली की, ‘शीझान खानला ४ दिवसांच्या कोठडीत पाठवण्यात आले आहे. पोलिसांकडे अद्याप कोणतेही पुरावे नाहीत. त्याच्यावर आरोप करण्यात आले आहेत. मात्र पुढील चौकशी करणे बाकी आहे’. झीशानच्या आईने केलेल्या तक्रारीच्या आधारावर पोलिसांनी शीझानविरोधात गुन्हा दाखल केला. आयपीसी कलम ३०६ अंतर्गत त्याला अटक करण्यात आली होती. त्यानेच तुनिषाला आत्महत्येसाठी प्रवृत्त केल्याचा तिच्या आईचा आरोप होता.
अभिनेत्याचा फोनही केला जप्त
दरम्यान २५ डिसेंबर रोजी शीझानविरोधात दाखल करण्यात आलेल्या एफआयआरची कॉपीही समोर आली होती. यामध्ये नमुद केल्याप्रमाणे तुनिषा-शीझान रिलेशनशिपमध्ये होते आणि त्यांचा १५ दिवसांपूर्वी ब्रेकअप झालेला. यानंतर अभिनेत्री अत्यंत तणावात होती, असेही या FIR कॉपीमध्ये म्हटले आहे. पोलिसांनी कोर्टाकडे झीशान खानसाठी ५-६ दिवसांची रिमांड माहितली होती, यानंतर वसई कोर्टाने त्याला ४ दिवसांची पोलीस कोठडी सुनावली असून त्याचा फोनही जप्त करण्यात आला आहे.
पोलिसांनी फेटाळली प्रेग्नन्सीची अफवा
तुनिषाचा मृतदेह मुंबईतील जेजे रुग्णालयात शनिवारी रात्री १.३० च्या सुमारास शवविच्छेदनासाठी पाठवण्यात आला होता. शवविच्छेदनाची प्रक्रिया पहाटे ४ च्या दरम्यान पार पाडली. यानंतर समोर आलेल्या पोस्टमॉर्टम रिपोर्टमध्ये डॉक्टरांच्या टीमने असे नमुद केले की अभिनेत्रीचा मृत्यू प्रामुख्याने गुदमरल्यामुळे झाला. दरम्यान पोलिसांनी अद्याप या अहवालावर कोणतेही जाहीर वक्तव्य केलेले नाही. अभिनेत्रीच्या निधनानंतर असेही समोर आले होते की, ती गरोदर होती. मात्र तिच्या गरोदरपणाची बातमी तपास अधिकाऱ्यांनी फेटाळून लावली आहे. गळफास घेतल्यानंतर गुदरमल्यामुळे अभिनेत्रीचे निधन झाल्याचे समोर आहे.
२६ डिसेंबर रोजी होणार पार्थिवावर अंत्यसंस्कार
तुनिषा शर्माच्या पार्थिवावर सोमवारी २६ डिसेंबर रोजी अंत्यसंस्कार होणार आहेत. तुनिषा मुळची चंदीगडची होती, त्यामुळे तिचे काही कुटुंबीय तिथून मुंबईत पोहोचणार आहेत. त्याचप्रमाणे कुटुंबातील इतर काही सदस्यही देश-विदेशातून मुंबईत पोहोचतील. त्यामुळे अभिनेत्रीच्या पार्थिवावर रविवारऐवजी सोमवारी अंत्यसंस्कार केले जातील. अवघ्या २० व्या वर्षी तिने इतके टोकाचे पाऊल उचचल्याने अभिनेत्रीच्या सगळ्या कुटुंबीयांवर दु:खाचा डोंगर कोसळला आहे. अभिनेत्रीची आई याप्रकरणी न्याच्या प्रतीक्षेत आहे.