साने गुरुजींची भूमिका लोकप्रिय अभिनेता अमित डोलावत साकारणार आहे. विविध हिंदी तसंच मराठी मालिकांमधून अमितने त्याच्या अभिनयाची छाप सोडली होती. आता तो साने गुरुजींची आव्हानात्मक भूमिका साकारताना दिसेल.‘महाराष्ट्र शाहीर’च्या निर्मात्यांनी २४ डिसेंबर रोजी, साने गुरुजींच्या जयंतीदिनानिमित्त प्रेक्षकांना हा सुखद धक्का दिला. शाहिरांच्या जीवनावरील हा चित्रपट २८ एप्रिल २०२३ रोजी तुमच्या जवळच्या सिनेमागृहात प्रदर्शित होत आहे.
हे वाचा-सेक्युलर राष्ट्राच्या सेक्युलर जनतेला अडचण नाही… ख्रिसमसवरुन केतकीचा टोमणा
साने गुरुजींनी वेळोवेळी शाहिरांच्या जीवनात येऊन त्यांना दिशा दिली. त्यांच्या आयुष्यातल्या अनेक महत्वाच्या घडामोडींना कारणीभूत असलेल्या साने गुरुजींची आज जयंती. यानिमित्त प्रेक्षकांसमोर ‘महाराष्ट्र शाहीर’मधील साने गुरुजींची पहिली झलक निर्मात्यांनी सादर केली. शाहीर साबळे आणि साने गुरुजी यांचे आदर्श नाते या सिनेमाद्वारे उलगडणार आहे.
कोण आहे अमित डोलावत?
अमित डोलावत हा भारतीय टेलिव्हिजन क्षेत्रातील एक आघाडीचा कलाकार आहे. २००३ मध्ये त्याने ‘पिया का घर’मधून आपल्या करियरला सुरुवात केली होती. त्याने दिव्य दृष्टी, देव, इश्क सुभान अल्लाह, बडी दूर से आये है या मालिकांमध्ये महत्त्वाचे काम केले होते. स्टार प्रवाह वरील ‘नवे लक्ष्य’ मालिकेने त्याला विशेष लोकप्रियता मिळवून दिली. अमितचा जन्म राजस्थानमधील जयपूर याठिकाणी झाला असून लहानपणापासून त्याला नृत्य आणि अभिनयाची आवड आहे. शिक्षण पूर्ण झाल्यानंतर त्याला ‘पिया का घर’मध्ये संधी मिळाली. अमितने आतापर्यंत ५० पेक्षा जास्त मालिकांमध्ये काम केले आहे.
अमितच्या या भूमिकेबद्दल बोलताना चित्रपट दिग्दर्शक केदार शिंदे म्हणाले की, ‘माझे आजोबा म्हणजे शाहिर साबळेंच्या आयुष्यात साने गुरुजींच्या नात्याला अनन्यसाधारण महत्त्व आहे. ते त्यांचे गुरु होते आणि त्यांच्या आयुष्याला गुरुजींनी कलाटणी दिली होती. त्यांची भूमिका अमित साकारतो आहे, याचा मला मनस्वी आनंद आहे. तो हिंदीतील एक प्रतिभावान अभिनेता आहे. उत्तम निर्मिती मूल्यांसाठी आम्ही आघाडीच्या कलाकारांना चित्रपटात स्थान दिले असून अमितचा या चित्रपटातील समावेश हे त्याचेच एक ध्योतक आहे.’
हे वाचा-विकत घ्यायला ती वस्तू आहे का? रहाणेचा फोटो शेअर करत का भडकले शरद पोंक्षे
‘महाराष्ट्र शाहीर’ची प्रस्तुती एव्हरेस्ट एन्टरटेन्मेंट आणि केदार शिंदे प्रॉडक्शन्सकडून केली जात आहे. या चित्रपटाचे निर्माते आहेत संजय छाब्रिया आणि बेला केदार शिंदे आहेत. दसऱ्याच्या शुभमुहूर्तावर या सिनेमाच्या शूटिंगला सुरुवात झाली असून सध्या वाई, भोर, पुणे, मुंबई अशा विविध ठिकाणी चित्रीकरण सुरु आहे. या सिनेमात मुख्य भूमिकेत अभिनेता अंकुश चौधरी आहे. शाहीर साबळेंच्या लूकमध्ये समोर आलेले अंकुशचे व्हिडिओ आणि फोटो यांचे विशेष कौतुक केले जातेय. त्याच्या लूकवर विशेष मेहनत घेण्यात आली आहे.
या चित्रपटाला अजय-अतुल यांचे संगीत आहे तर चित्रपटाचे लेखन ज्येष्ठ लेखिका व दिग्दर्शिका प्रतिमा कुलकर्णी यांचे आहे. चित्रपटात शाहिरांच्या इतर समकालीन आणि महत्त्वाच्या व्यक्तिरेखा कोण साकारणार याबद्दलची उत्सुकता सुरुवातीपासून लागून राहिली होती. त्याअंतर्गतच आज साने गुरुजींची भूमिका साकारणाऱ्या अभिनेत्याचा लूक रीव्हिल करण्यात आला.