तुझे मेरी कसमने बदललं रितेशचं आयुष्य
‘तुझे मेरी कसम’ हा २००३ मधीलचा हिट चित्रपट होता. महाराष्ट्राचे तत्कालीन मुख्यमंत्री विलासराव देशमुख यांचा मुलगा सिनेसृष्टीत प्रवेश करेल आणि स्टार होईल, याची कोणी कल्पनाही केली नव्हती. सरळ, साधे आणि प्रसन्न स्वभावाचे विलासराव देशमुख यांनाही सुरुवातीला हे पटले नव्हते. म्हणूनच परदेशात आर्किटेक्चरची नोकरी करून परतलेल्या रितेश देशमुखला वडिलांनी स्पष्टपणे सांगितले होते की, तुला संधी आहे. जर तुला वाटत असेल की तू हिरो होऊ शकतो तर नक्की प्रयत्न कर, पण जर चित्रपट फ्लॉप झाला तर पुन्हा चित्रपटांचं नाव घेऊ नको.
जिनिलिया-रितेशचा चित्रपट कधीच डीव्हीडीवर प्रदर्शित झाला नाही
तुझे मेरी कसमची खास गोष्ट म्हणजे या कॉलेज लव्हस्टोरीला प्रेक्षकांची पसंती तर मिळालीच पण ती संगीतमयही ठरली. ऑडिओ कॅसेटच्या जमान्यात या चित्रपटाच्या गाण्यांनी धुमाकूळ घातला होता. हा चित्रपटही सुपरहिट झाला होता. पण सिनेमा कधीही डीव्हीडीवर रिलीज झाला नाही. एवढेच नाही तर हा चित्रपट ब्रिटन आणि कॅनडामध्येही प्रदर्शित झाला नव्हता. असे का घडले याचे कोणतेही कारण सांगितले गेले नाही.
प्रथम मल्याळम, नंतर तेलगू आणि नंतर हिंदीमध्ये बनवला सिनेमा
‘तुझे मेरी कसम’ हा तेलगू ब्लॉकबस्टर चित्रपट ‘नुववे कवाली’चा रिमेक होता. जो मल्याळम चित्रपट ‘निराम’चा रिमेक होता. रितेश आणि जिनिलिया यांच्याशिवाय बिपाशा बासूनेही या चित्रपटात कॅमिओ केला होता. चित्रपटात एक सीन आहे ज्यात जिनिलियाचं पात्र रितेशला सहा वेळा कानशिलात लगावते. गंमत म्हणजे या सीनला दिग्दर्शकाने हिरवा कंदील दिला होता, मात्र तरीही रितेशने हा सीन पुन्हा शूट करण्याची विनंती केली. त्याचा परिणाम असा झाला की त्याचे गाल लाल झाले.
विलासराव देशमुख यांच्या राजीनाम्याची मागणी केली
विलासराव देशमुख काँग्रेस पक्षाचे मोठे नेते होते. १९९९ ते २००३ आणि पुन्हा २००४ ते २००८ पर्यंत ते महाराष्ट्राचे मुख्यमंत्री होते. यानंतर ते मनमोहन सिंग यांच्या सरकारमध्ये सायन्स अँड टेक्‍नोलॉजी मंत्री आणि अर्थ सायन्स मंत्रीदेखील होते. २००३ मध्ये ‘तुझे मेरी कसम’ रिलीज होण्यापूर्वी विरोधी पक्षांनी विलासरावांवर अनेक गंभीर आरोप केले होते. रितेश वडिलांच्या नावाचा उपयोग करून सिनेमाचं प्रमोशन करत असल्याचं सांगण्यात आलं होतं.
देशमुखांवर अनेक गंभीर आरोप करण्यात आले होते
एवढेच नाही तर महाराष्ट्रात हा सिनेमा जाणीवपूर्वक अधिकाधिक स्क्रीनवर प्रदर्शित केला जात असल्याचा आरोपही झाला होता. विरोधाचा आवाज इतका वाढला की राज्यातील विरोधी पक्षांनी मुख्यमंत्र्यांच्या राजीनाम्याची मागणीही केली होती. मात्र, विलासराव देशमुख आणि रितेश देशमुख या दोघांनीही हे आरोप फेटाळून लावले. चित्रपटाबाबत आणखी एक आरोप करण्यात आला होता, जो अधिक गंभीर होता. २००३ हा काळ होता जेव्हा केबल ऑपरेटर्सचा कल जास्त होता. बरेचसे टीव्ही केबल कनेक्शननेच चालायचे. हे केबल ऑपरेटरही आपापल्या स्तरावर सीडी-डीव्हीडीद्वारे चित्रपट दाखवायचे.
केबल ऑपरेटर्सना धमक्या दिल्याचा आरोप
मग सीडी आणि डीव्हीडी कॅसेटच्या माध्यमातून मोठ्या प्रमाणात पायरसी झाली, ज्याचा थेट संबंध पाकिस्तानशी जोडला गेला. पायरसीचा सर्वात मोठा धंदा सीमेपलीकडे चालू होता. रितेशवर वडिलांच्या नावाचं वजन वापरून काँग्रेसच्या स्थानिक नेत्यांसह केबल ऑपरेटर्सना धमक्या दिल्याचा आरोप करण्यात आला होता. पायरसीच्या माध्यमातून ‘तुझे मेरी कसम’ केबलवर प्रसारित झाल्यास या ऑपरेटर्सचे परवाने जप्त केले जातील, असे सांगितले. मात्र, नंतर ही बाब केवळ आरोप आणि अफवा ठरली.