प्रसिद्ध जोडप्यांनी घेतला वेगळं होण्याचा निर्णय
२०२२ या वर्षात मराठी फिल्म इंडस्ट्रीतील अनेक जोडप्यांची लग्न झाली, अनेक जोडप्यांनी आयुष्यभर एकत्र राहण्याच्या आणाभाका घेतल्या. मात्र या वर्षात काही धक्कादायक ब्रेकअप आणि घटस्फोटही झाले. जे कपल्स सर्वात रोमँटिक म्हणून ओळखले जायचे त्यांनी वेगळे होण्याचा निर्णय घेत त्यांच्या चाहत्यांना धक्का दिला होता.
मानसी नाईक आणि प्रदीप खरेरा
मराठी इंडस्ट्रीतील रोमंटिक जोडप्यांपैकी एक म्हणून ओळखले जाणारे मानसी नाईक आणि प्रदीप खरेरा यांनी अलीकडेच घटस्फोटाची घोषणा केला. लग्नानंतर अवघ्या एका वर्षात हे कपल वेगळे होते असल्याने चाहत्यांना मोठा धक्का बसला. जानेवारी २०२१ मध्ये त्यांनी लग्न केले होते आणि लग्नाचा दुसरा वाझदिवस साजरा करण्यापूर्वीच त्यांनी आपापली वाट बदलली. मानसीने एका मुलाखतीत याविषयी माहिती दिली, तिने प्रदीपशी घटस्फोट घेण्याची कारणंही सांगितली. बॉक्सर असणाऱ्या प्रदीपने प्रसिद्धी आणि पैशासाठी तिचा वापर केल्याचे अभिनेत्रीचे म्हणणे आहे. या दोघांनी एकमेकांपासून वेगळे होण्याचा निर्णय घेतल्यानंतर ते एकमेकांना सूचक अशा पोस्टही सोशल मीडियावर शेअर करत आहेत. मानसी आणि प्रदीपने इन्स्टाग्रामवरील त्यांचे रोमँटिक फोटोही डिलिट केले.
शिव ठाकरे आणि वीणा जगताप
बिग बॉस मराठी सीझन २ चे स्पर्धक आणि लव्हबर्ड्स शिव ठाकरे आणि वीणा जगताप यांचेही २०२२ मध्ये ब्रेकअप झाले. शिवने बिग बॉस मराठीच्या घरात वीणाच्या नावाचा टॅटूही काढला होता. बिग बॉसच्या घरात असताना आणि बाहेर पडल्यानंतर या जोडीची विशेष चर्चा झाली. सध्या बिग बॉस १६ चे पर्व गाजवत असणाऱ्या शिवने काही महिन्यांपूर्वी तिच्यासोबत ब्रेकअप झाल्याची कबुली कॅमेऱ्यासमोर दिली. साजिद खानशी झालेल्या संभाषणात त्याने ब्रेकअपविषयी संभाषण केले. त्याने असे सांगितले की या ब्रेकअपनंतर वीणा अद्याप मुव्ह ऑन झाली नाही. काही दिवसांपूर्वी शिव बिग बॉससमोर रडू लागला होता, तेव्हा त्याने वीणाचा उल्लेख केलेला. त्यावर वीणाने सोशल मीडिया पोस्ट करत त्याला पाठिंबा देणारी पोस्ट केली होती. यावरुन ब्रेकअपनंतरही त्यांच्यामध्ये मैत्री कायम आहे हे मात्र नक्की!
रुपाली भोसले आणि अंकित मगरे
आई कुठे काय करते फेम संजना अर्थात अभिनेत्री रुपाली भोसलेचे २०२२ या वर्षात बॉयफ्रेंड अंकित मगरेसोबत ब्रेकअप झाले. या जोडप्याची सोशल मीडियावर विशेष चर्चा झालेली, त्यानंतर त्यांनी सोशल मीडिया प्लॅटफॉर्मवरून त्यांचे सर्व फोटो हटवले होते. रुपाली आणि अंकितने वेगळे होण्याचा घेतलेला निर्णय सर्वांसाठीच धक्कादायक होता. दरम्यान त्यांच्या ब्रेकअपचे कारण अद्याप समोर आले नाही.
अनिकेत विश्वासराव आणि स्नेहा चव्हाण
२०२१ मध्ये अभिनेता अनिकेत विश्वासराववर त्याच्या पत्नीने कौंटुबिक हिंसाचाराचे आरोप केले होते. हे प्रकरण त्यावेळी विशेष गाजले. दरम्यान २०२२ मध्ये या जोडप्याचा घटस्फोट झाला. अनिकेत आणि स्नेहा यांचा विवाह २०१८ साली मोठ्या धुमधडाक्यात झाला होता. मात्र त्यानंतर अनैतिक संबंध, चित्रपटसृष्टीमध्ये आपल्यापेक्षा आपल्या पत्नीचे नाव मोठे होईल या भीतीपोटी सासरच्यांकडून आपल्याला जीवे मारण्याची धमकी देण्यात आल्याचा आरोप स्नेहाने केला होता. तिचा गळा दाबून मारण्याचा प्रयत्न झाला असाही आरोप तिने केला.
प्राजक्ता माळी
प्राजक्ता माळी हिने अलीकडेच तिच्या एका चित्रपटासाठी झालेल्या पत्रकार परिषदेत खुलासा केला होता की जेव्हा ती सिनेमाचे शूटिंग करत होती तेव्हा तिचे ब्रेकअप झाले होते. प्राजक्ता म्हणाली होती की, ‘मला माझे डायलॉग्स आठवत नाहीत. खरं तर, माझ्या वैयक्तिक आयुष्यात मी त्यावेळी खडतर प्रसंगातून जात होते, त्यामुळे शूटिंगमधील फारसे काही आठवत नाही. माझ्या ब्रेकअपमुळे मी माझ्या विचारात हरवले होते. चित्रपटाचे शूटिंग सुरू असतानाच ब्रेकअप झाले आणि अनेक विचार माझ्या मनात घोळत होते. मी माझ्याच झोनमध्ये होते.’ अभिनेत्रीचे कोणासोबत ब्रेकअप झाले याचा खुलासा मात्र झाला नव्हता.