केके (कृष्णकुमार कुन्नथ)
ज्याने तरुणाईला प्रेम, दोस्ती, रोमान्स गाण्यातून ऐकवला त्या गायक केके यांचे निधन यावर्षी मे २०२२ मध्ये झाले. ३१ मे रोजी कोलकाता याठिकाणी त्यांनी अखेरचा श्वास घेतला. कोलकातामध्ये लाइव्ह कॉन्सर्टमध्ये तब्येत बिघडल्याने त्यांना तातडीने रुग्णालयात दाखल करण्यात आले. हृदयविकाराच्या झटक्याने त्यांचे निधन झाले. वयाच्या ५३ व्या वर्षी त्यांनी जगाचा निरोप घेतला. केके यांची बॉलिवूडमधील सर्वोत्तम गायकांमध्ये गणना होते. त्यांनी अनेक भारतीय भाषांमधील गीतांना आपला आवाज दिला आहे.
राजू श्रीवास्तव
गायक केके यांच्या निधनानंतर आणखी एका व्यक्तीच्या मृत्यूचा मोठा झटका प्रेक्षकांना बसलेला. प्रसिद्ध स्टँडअप कॉमेडियन राजू श्रीवास्तव यांचे निधन प्रेक्षकांसाठी धक्कादायक होते. २१ सप्टेंबर २०२२ रोजी त्यांचे निधन झाले. ते ५८ वर्षांचे होते. राजू यांच्यावर दिल्लीतील एम्समध्ये उपचार सुरू असताना त्यांनी अखेरचा श्वास घेतला. राजू श्रीवास्तव जवळपास ४० दिवसांसाठी या रुग्णालयात उपचार घेत होते. जिममध्ये व्यायाम करत असताना राजू यांना हृदयविकाराचा झटका आलेला. ट्रेडमिलवर चालत असताना अचानक त्यांच्या छातीत दुखू लागले आणि त्यांना तातडीने रुग्णालयात भरती करण्यात आले होते. यानंतर काही दिवस ते मृत्यूशी झुंज देत होते, अनेकदा त्यांच्या निधनाच्या अफवाही पसरल्या. दरम्यान २१ सप्टेंबर रोजी त्यांनी अखेरचा श्वास घेतला.
दीपेश भान
‘भाभी जी घर पर है’ फेम अभिनेते दीपेश भान मलखान ही भूमिका करून घराघरात पोहोचले होते. २०१५ सालापासून ते या मालिकेत काम करत होते. दीपश यांचे वयाच्या अवघ्या ४१ व्या वर्षी निधने झाले. हृदयविकाराच्या झटक्याने अभिनेत्याने अखेरचा श्वास घेतला. २३ जुलै २०२२ रोजी ही दुर्घटना घडली. क्रिकेट खेळत असताना हार्ट अटॅक आल्याने अभिनेत्याचा मृत्यू झाला. ३ वर्षांपूर्वीच त्यांचे लग्न झाले होते. २०२१ मध्येच दीपेश बाबा झाले होते.
सिद्धांत वीर सूर्यवंशी
आणखी एक टीव्ही अभिनेता सिद्धांत वीर सूर्यवंशी याचेही कमी वयात हृदयविकाराचा झटका आल्याने निधन झाले. तो अवघा ४६ वर्षांचा होता. सिद्धातला वर्कआउट करायला विशेष आवडत असे आणि जिम करत असतानाच त्याला हार्ट अटॅक आला. बेशुद्ध झालेल्या सिद्धांतला मुंबईतील कोकिलाबेन रुग्णालयात भरती करण्यात आले होते. त्याच्यावर १ तासभर उपचारही केले गेले, मात्र यातून अभिनेता वाचू शकला नाही.
तबस्सुम
हिंदी चित्रपटसृष्टीतील ज्येष्ठ अभिनेत्री तबस्सुम गोविल यांचे १९ नोव्हेंबर २०२२ रोजी निधन झाले. त्या ७८ वर्षांच्या होत्या. हृदयविकाराच्या झटक्याने त्यांचे निधन झाले. ‘फूल खिले हैं गुलशन गुलशन’ या शोमधून तबस्सुम यांनी विशेष लोकप्रियता मिळवली होती. त्यांना रात्री ८.४० आणि ८.४२ वाजता असा दोन वेळा हृदयविकाराचा झटका आल्याची माहिती त्यांच्या मुलाने दिली होती.
अँड्रिला शर्मा
अभिनेत्री अँड्रिला शर्माच्या मृत्यूनंतर बंगाली मनोरंजन विश्व हादरले होते. २४ वर्षीय अभिनेत्रीच्या पश्चात तिचे आई-वडील आणि बॉयफ्रेंड अभिनेता सब्यसाची चौधरी अशा जवळच्या व्यक्ती आहेत. २० नोव्हेंबर रोजी दुपारी अभिनेत्रीने अखेरचा श्वास घेतला. दोन वेळा कॅन्सरला हरवणारी अँड्रिला ब्रेन स्ट्रोक आणि कार्डियाक अरेस्टविरोधातील लढाई जिंकू शकली नाही. तिला मल्टिपल कार्डियाक अरेस्टचा सामना करावा लागलेला. २० दिवसांनी रुग्णालयात मृत्यूशी सामना केल्यानंतर अभिनेत्रीचे निधन झाले.
हार्ट अटॅक ठरलं मृत्यूचं कारण
२०२२ या वर्षामध्ये या कलाकारांच्या मृत्यूला कारणीभूत हृदयविकाराचा झटका ठरला. सोशल मीडियावरही या सर्वच कलाकारांच्या जाण्याने हळहळ व्यक्त करण्यात आली. गायक केके, कॉमेडियन राजू श्रीवास्तव, अभिनेता दीपेश भान, सिद्धार्थ वीर सूर्यवंशी, अभिनेत्री तबस्सुम, अँड्रिला शर्मा या सर्व कलाकारांच्या जाण्याने मनोरंजन विश्वात न भरून निघणारी एक पोकळी निर्माण झाली आहे.