रितेश आणि जिनिलियाने अंबाबाईचे विधीवत दर्शन घेतल्यानंतर देवस्थान समितीकडून दोघांचा सत्कार करण्यात आल्याची माहिती मिळते आहे. जवळपास २० वर्ष अभिनय क्षेत्रात कार्यरत असणाऱ्या रितेशने पहिल्यांदाच दिग्दर्शनाची धुरा सांभाळली आहे. त्यामुळे हा सिनेमा सुपरहिट ठरावा असं साकडंच या जोडप्याने अंबाबाईला घातलं आहे.
दरम्यान कोल्हापुरात विविध ठिकाणी प्रमोशन करतानाचे या दोघांचे व्हिडिओ आणि फोटोही समोर आले आहे. डी. वाय. पाटील महाविद्यालयातही ही जोडी पोहोचली होती. ‘कोल्हापूरचा नादखुळा’ असं म्हणत रितेशने त्याच्या इन्स्टाग्रावर त्याच्या शेकडो चाहत्यांसह एक सेल्फी व्हिडिओ शेअर केला.
तसंच त्याचे विविध व्हिडिओ इन्स्टाग्रामवर फॅनकडून शेअर करण्यात आले आहेत. या सिनेमात सलमान खान आणि रितेश यांच्यावर चित्रित झालेलं ‘वेड लावलंय’ या गाण्यावर डान्स करत रितेश सिनेमाचे प्रमोशन करतोय. त्याच्या चाहत्यांनीही हे व्हिडिओ सोशल मीडियावर पोस्ट केले असूनही रितेशही आनंदाने ते रिपोस्ट करतो आहे.
समोर आलेल्या या व्हिडिओंवरुन चाहत्यांचा चांगला प्रतिसात रितेश-जिनिलियाच्या सिनेमाला मिळतोय असे दिसले. या सिनेमातील गाणी, टीझर आणि ट्रेलरलाही प्रेक्षकांनी विशेष पसंती दिली. जिनिलिया आण रितेश ही महाराष्ट्रातील प्रेक्षकांची आवडती जोडी असल्याने सिनेमाला रीलिजपूर्वी मिळणारा प्रतिसादही चांगला आहे. असे बोलले जात होते की हा सिनेमा नागा चैतन्य आणि सामंथा यांच्या ‘मजिली’ या दाक्षिणात्य सिनेमाचा मराठी रिमेक आहे. याबाबतही कमेंट करत चाहते म्हणतायंत की जरी असे असले तरी आम्ही रितेश-जिनिलियासाठी हा सिनेमा पाहू. रितेशनेही ट्रेलर लाँचवेळी असे म्हटले होते की ‘वेड’ या ‘मजिली’वर आधारित आहे.
दरम्यान ३० डिसेंबर रोजी प्रदर्शित होणाऱ्या या सिनेमात रितेश-जिनिलियासह अशोक सराफ, जिया शंकर, शुभंकर तावडे हे कलाकारही आहे. सिनेमात कॉलेजवाली प्रेमकहाणी, रोमान्स, विरह आणि लव्ह ट्रँगल पाहायला मिळणार आहे.