सुमीत आणि मोनिका यांचं अरेंज मॅरेज आहे. मोनिका ही मुळची जळगावची असून ती आयटी सेक्टरमध्ये काम करते. नोकरीच्या निमित्ताने मोनिका औरंगाबादला राहते. तर सुमितचं मूळ गाव औरंगाबाद आहे. १३ डिसेंबरला सुमितचा साखरपुडा आणि हळदीचा कार्यक्रम झाला. यावेळी पिवळ्या रंगाच्या कुर्त्यात सुमीत राजबिंडा दिसत होता. लग्नासाठी सुमितने मोती रंगाचा कुर्ता आणि हिरव्या रंगाची धोती घातली होती. तर मोनिकाने लाल रंगाच्या पैठणीची निवड केली होती.
सुमीत मालिकेमुळे चर्चेत असतोच पण १६ नोव्हेंबरला त्याने एका मुलीच्या हातात हात असलेला फोटो शेअर केला होता. त्याच्या इन्स्टापेजवर शेअर झालेल्या या फोटोतून त्याच्या आयुष्यात एक मुलगी आली असल्याची शंका चाहत्यांना आली. त्यानंतर लगेच सुमीतने मोनिकासोबत प्रीवेडिंग फोटो शूट करत त्यांचे फोटो शेअर केले. उनका हात पकडना तो एक बहाना था, मकसद तो लकीरोंसे लकीर जोडना था अशी कॅप्शन सुमीतने मोनिकासोबतच्या फोटोला दिली होती. तर शी सेड येस असं म्हणत त्याने दुसरा फोटो शेअर केला. त्यानंतर सुमीत लग्न करत असल्याची बातमी पसरली. लग्न ठरल्याची बातमी दिल्यानंतर महिन्याभराच्या आतच सुमीत आणि मोनिकाच्या लग्नाचा बार उडाला आहे.
सुमीतने आजपर्यंत अनेक मालिकांमध्ये विविध भूमिका केल्या, मात्र त्याला खरी लोकप्रियता मिळाली ती बाळूमामा या भूमिकेमुळेच. गेल्या तीन वर्षांपासून ही मालिका सुरू आहे आणि प्रेक्षकांच्या प्रतिसादामुळे या मालिकेचा टीआरपीही चांगला आहे. बाळूमामांच्या तरूणपणापासून ते त्यांच्या वार्धक्यापर्यंतच्या अनेक छटा दाखवण्यात अभिनेता सुमित पुसावळे याने बाजी मारली आहे.