मुंबई– लोकप्रिय बॉलिवूड अभिनेता शाहिद कपूर याची पत्नी मीरा राजपूत सोशल मीडियावर प्रचंड सक्रिय असते. ती नेहमीच तिचे फोटो आणि व्हिडिओ सोशल मीडियावर शेअर करत असते. आपल्या पोस्टमधून ती नेटकऱ्यांसोबत संवाद साधताना दिसते. यावेळेसही तिने तिच्यासोबत घडलेला एक मजेशीर किस्सा चाहत्यांसोबत शेअर केला आहे. मीराला विमानप्रवासावेळी सुरक्षारक्षकांकडून अडवण्यात आलं तेही एका लोणच्याच्या बरणीमुळे. मात्र त्यानंतर जे झालं ते पाहून मीरा आणि सुरक्षारक्षक दोघेही हसू लागले. नेमकं काय घडलं होतं हे मीराने तिच्या इन्स्टाग्राम स्टोरीवर पोस्ट करत सांगितलं आहे.
मीरा नाताळ सणासाठी आपल्या आईकडे जात असताना हा प्रसंग घडला आहे. ती आईला भेटण्यासाठी जात असताना तिला विमानतळावर सुरक्षारक्षकांनी अडवलं आणि तिच्या सामानाची झडती घ्यावी लागेल असं म्हटलं. सुरक्षारक्षकांनी तिची संपूर्ण बॅग रिकामी केली. मात्र त्यातून जे निघालं ते पाहून त्यांनाही हसू आवरलं नाही. तिच्या सामनात फ्लॉवर आणि गाजराच्या लोणच्याची बरणी पाहून त्यांनीही मीराला जाऊ दिलं. ते फक्त हसले आणि म्हणाले, ‘लोणचं आहे, जाऊद्या.’ हा सगळा घटनाक्रम मीराने फोटो टाकत शेअर केला. मीराने स्टोरीमध्ये लोणच्याच्या बरणीचा फोटो शेअर करत लिहिलं, ‘जेव्हा तुम्हाला विमानतळावर गाजर आणि फ्लॉवरच्या प्रेमाने नेलेल्या लोणच्यामुळं अडवलं जातं. तुम्हाला ठाऊक आहे ना पंजाबी कसे असतात आणि हे बघून ते फक्त हसले आणि म्हणाले, जाऊद्या लोणचं आहे.’
मीराने ख्रिसमस हा सॅन अतिशय आनंदाने साजरा केला. ख्रिस्तमसला मीराने शाहिदसोबतचा एक सुंदर फोटो शेअर केला आणि कॅप्शनमध्ये लिहिलं, ‘माझ्या आणि माझ्या सांताकडून ख्रिसमसच्या शुभेच्छा. आमची दोन्ही मुलं त्यांच्या भेटवस्तू बघण्यात व्यग्र आहेत. मीराच्या या फोटोवर चाहत्यांनी भरभरून प्रेमाचा वर्षाव केला आहे. शाहिदबद्दल सांगायचं तर तो शेवटी ‘जर्सी’ या चित्रपटात दिसला होता. हा चित्रपट दाक्षिणात्य चित्रपटाचा रिमेक होता. मात्र हा चित्रपट बॉक्स ऑफिसवर फार कमाल दाखवू शकला नाही.
