आपल्या अभिनयाने आणि सौंदर्याने प्रेक्षकांच्या मनात स्थान निर्माण करणारी लोकप्रिय अभिनेत्री रकुलप्रीत सिंग हिने तब्बल ११ तास पाण्यात राहून पुढील चित्रपटासाठी चित्रीकरण केलं आहे. तिने इन्स्टाग्रामवर स्टोरी टाकत तिचा एक फोटो शेअर केला होता. यात तिच्या अंगावर दोन टॉवेल दिसत आहेत. सोबतच तिने डोक्यापासून अंगावर घेतलं आहे. ती थंडीने कुडकुडत आहे. तर कुणीतरी तिला औषध भरवत आहे. ११ तास पाण्यात राहिल्यामुळे तिची ही अवस्था झाली आहे. परंतु, आपल्या या अवस्थेचं तिला मुळीच वाईट वाटत नाहीये. रकुलने हा फोटो पोस्ट करत लिहिलं, ‘आज ११ तास पाण्यात राहून चित्रीकरण केलं. खूप अवघड चित्रीकरण होतं पण आता भरलेली ही हुडहुडी मोलाची आहे. ती मुळीच वाया गेलेली नाही. काढा किंवा हे औषध मला गरम ठेवायला मदत करतंय.’
रकुलचा हा फोटो सोशल मीडियावर व्हायरल झालाय. ती तिच्या आगामी चित्रपटाच्या चित्रीकरणात व्यग्र आहे. यापूर्वी ती ‘थँक गॉड’ या चित्रपटात दिसली होती. यात अजय देवगण आणि सिद्धार्थ मल्होत्रा मुख्य भूमिकेत होते. यासोबतच ती अक्षय कुमारच्या ‘कठपुतली’ या चित्रपटात झळकली होती. तिचा ‘डॉक्टर- जी’ हा चित्रपटही नुकताच प्रदर्शित झाला होता.