देवोलिनानं नेमकं कुणाशी लग्न केलं याची उत्सुकता तिच्या चाहत्यांना होती. त्याबाबत अनेकांनी तिला विचारणाही केली. परंतु देवोलिनानं तिच्या नवऱ्याबद्दल काहीही सांगायला नकार दिला. मात्र देवोलिनानं कुणाशी लग्न केलं या गोष्टीचा खुलासा झाला आहे.
कोण आहे देवोलिनाचा नवरा?
देवोलिना ही छोट्या पडद्यावरची लोकप्रिय अभिनेत्री आहे. देवोलिनानं जसं गपचूप लग्न केलं तसं अनेकांनी केलं. परंतु लग्नानंतर कलाकारांनी त्यांच्या साथीदाराचा फोटो आणि नाव ही जगासमोर आणलं. परंतु देवोलिनानं मात्र तिच्या नवऱ्याचं नाव आणि त्याचा फोटो शेअर करण्यास नकार दिला होता. त्यानंतर तिच्या नवऱ्याबाबतची उत्सुकता अधिकच वाढली. देवोलिनाचा नवरा नेमका कोण आहे, याचा शोध घेतला असता त्याचं नाव शहनवाज शेख असल्याचं समोर आलं आहे. देवोलिनानं सुरुवातीला तिच्या नवऱ्याबद्दल काहीही सांगायला नकार दिला होता. त्यामुळे तिनं नेमकं कुणाशी लग्न केलं याची सर्वांनाच उत्सुकता होती. अखेर संध्याकाळी देवोलिनानं तिच्या इन्स्टाग्रामवर शहनावजबरोबरचे काही फोटो शेअर केले. या पोस्टमध्ये देवोलिना शहनवाजला शोनू म्हणत असल्याचं समोर आलं आहे.
हे फोटो पोस्ट करताना तिनं लिहिलं आहे की, ‘हो मी अभिमानानं सांगू शकते की अखेर मी हे केलं. हो मी आणि शोनू. दिवा घेऊन जरी मी शोधायला गेले असते तर याच्यासारखा मला मिळाला नसता. तू माझ्या प्रत्येक दुःखाचं आणि प्रत्येक प्रार्थनेचं उत्तर आहेस. शोनू तुझ्यावर माझं खूप प्रेम आहे. आमच्यावर तुम्हा सर्वांचा आशिर्वाद असू द्या. मिस्ट्री मॅन उर्फ प्रसिद्ध शोनू आणि तुम्हा सर्वांचे भावोजी’. असं म्हणत #devoleena #taken #couplegoals #finallyhooked असे हॅशटॅग वापरले आहेत.
या कारणामुळे केलं गपचूप लग्न
देवोलिनाच्या जवळच्या व्यक्तीनं दिलेल्या माहितीनुसार तिचं आणि शहनवाज यांनी जाणिवपूर्वक गपचूप लग्न केलं. या दोघांच्याही कुटुंबियांना थाटामाटात लग्न करायचं नव्हतं. त्यामुळेच या दोघांनी १४ डिसेंबरला मुंबईत कोर्ट मॅरेज केलं आहे. त्यानंतर लोनावळ्याला त्यांनी मित्रमंडळींबरोबर गेट टू गेदर केलं.
कोण आहे शहनवाज?
शहनवाज शेख हा जिम ट्रेनर आहे. देवोलिना जेव्हा बिग बॉस १३ मध्ये होती तेव्हा ती कुणालातरी डेट करत असल्याचं सांगितलं होतं. अर्थात तिनं त्यावेळी शहनवाजचं नाव घेतलं नव्हतं. शहनवाज आणि देवोलिनाची भेट जिममध्ये झाली. ही जिम तिच्या घराच्या जवळच आहे. साथिया मालिकेच्या सेटवर देवोलिनाचा अपघात झाला होता. त्यावेळी शहनवाजनं तिला आधार दिला होता. तिला बरं करण्यात त्याची महत्त्वाची भूमिका होती. शहनवाजच्या स्वभावामुळे देवोलिना त्याच्या प्रेमात पडली. त्यानंतर जवळपास दोन वर्षे ते एकमेकांना डेट करत होते. आता त्या दोघांनी एकमेकांना आयुष्याचं जोडीदार म्हणून स्विकारलं आहे.
विशाल सिंहबरोबर अफेअरची होती चर्चा
देवोलिना आणि विशाल सिंह हे एकमेकांचे चांगले मित्र आहेत. या दोघांचा बाँड पाहून ते एकमेकांना डेट करत असल्याच्या जोरदार चर्चा होत्या. दोघांनही ते फक्त चांगले मित्र असल्याचं वारंवार सांगितलंही होतं. आता देवोलीनाच्या लग्नामध्ये विशाल तिच्याबरोबर होता.
देवोलीनानं लग्न केल्याचं समजताच चाहत्यांनी तसंच तिच्या सहकलाकारांनी तिच्यावर शुभेच्छांचा वर्षाव केला आहे. तसंच तिला वैवाहिक आय़ुष्यासाठी सदिच्छाही दिल्या आहेत.