सोशल मीडियावर व्हायरल होणाऱ्या फोटोमध्ये एक चिमुकली आपल्या आईच्या कडेवर बसली आहे आणि रागातच कॅमेऱ्याकडे पाहत आहे. तर दुसऱ्या फोटोमध्ये ती अगदीच लहान आहे आणि डोक्याला बांधलेल्या मफलरमुळे ती अतिशय गोड दिसत आहे. फोटोंमध्ये दिसणारी ही चिमुकली अभिनेत्री दुसरी तिसरी कुणी नसून लोकप्रिय बॉलिवूड अभिनेत्री जिनिलिया डिसुझा आहे. तिच्या बालपणीचे हे फोटो स्वतः जिनिलियाने चाहत्यांसोबत शेअर केले आहेत. मात्र त्याला कारणही खास आहे. आज जिनिलियाच्या आईचा वाढदिवस आहे. तिने एक पोस्ट करत आईला वाढदिवसाच्या शुभेच्छा दिल्या आहेत. या पोस्टमध्ये तिने आईसोबतचे काही फोटो शेअर केले आहेत.
ही पोस्ट करत जिनिलियाने लिहिलं, ‘लाखो वेळा मी तुझे आभार मानायला विसरले आणि त्याहूनही अधिक वेळा न बोलता राहिले. पण आज मला सांगायचंय. मला आवडतं जेव्हा तू शांतपणे माझं सगळं ऐकून घेते. तू मला दाखवलेला पाठिंबा, माझे अश्रू आणि माझं जिंकणं सगळंच वाटून घेतल्याबद्दल धन्यवाद. माझं तुझ्यावर खूप प्रेम आहे. आई खूप महान असते.’ जेनेलियाची ही पोस्ट सोशल मीडियावर व्हायरल झाली आहे. जिनिलिया लवकरच ‘वेड’ या चित्रपटातून मराठी चित्रपटसृष्टीत पदार्पण करत आहे. चित्रपटात ती अभिनेता रितेश देशमुखसोबत मुख्य भूमिकेत दिसणार आहे. हा चित्रपट एका दाक्षिणात्य चित्रपटाचा रिमेक असल्याचं म्हटलं जातंय. मात्र या चित्रपटाच्या प्रोमोला प्रेक्षकांचा जबरदस्त प्रतिसाद मिळाला आहे.