तुनिषाच्या आईचे शीझानवर पुन्हा एकदा गंभीर आरोप
शीझान खानला अटक झाल्यानंतर याप्रकरणी पोलिसांनी आतापर्यंत २१ जणांचे जबाब नोंदवले आहात. गुरुवारी तुनिषाची आई वनिता, मामा पवन शर्मा आणि ड्रायव्हरचे जबाब नोंदवण्यात आले. पोलीस पालघर इथं असलेल्या ‘अली बाबा : दास्तान-ए-काबुल’ मालिकेच्या सेटवर जाऊन तुनिषाच्या आत्महत्येची घटना रीक्रिएट करणार आहेत. तुनिषाच्या आत्महत्या प्रकरणात सर्वात जास्त खळबळजनक खुलासा तिच्या आईनं वनिता यांनी केला आहे. त्यांनी शिझान खान याच्यावर अनेक गंभीर आरोप केले आहेत.
‘शीझान ड्रग्ज घ्यायचा’
वनिता यांनी एएनआय वृत्तसंस्थेला दिलेल्या मुलाखतीमध्ये सांगितलं की ‘शीझान खान ड्रग्ज घ्यायचा. अर्थात तो कधीपासून ड्रग्ज घ्यायचा हे मला माहिती नाही.’ केवळ इतकंच नाही तर तुनिषाचे मामा पवन शर्मा यांनी दिलेल्या माहितीप्रमाणेच वनिता यांनीही सांगितलं की, ‘तुनिषाच्या आयुष्यात शीझान आल्यापासून तिच्या वागण्या बोलण्यात खूप बदल झाला होता. ती हिजाब वापरू लागली होती. इतकंच नाही तर शिझान तिला उर्दूदेखील शिकवत होता. तुनिषाचा मृत्यू झाल्यानंतर शीझाननं तिला कोणतीही मदत केली नव्हती.’
तुनिषाच्या मोलकरणीचा खळबळजनक खुलासा
मीडिया रिपोर्टनुसार, तुनिषाच्या घरी काम करणाऱ्या मोलकरणीनं काही खळबळजनक खुलासे केले आहेत. तिनं सांगितलं की, ‘तुनिषा आणि शीझान दोघंजण लग्नाची तयारी करत होते. तुनिषा आणि शीझान एकमेकांच्या घरी सतत जायचे. इतकंच नाही तर ते एकमेकांच्या घरी चार-सहा दिवस रहायचे देखील. तुनिषाची आई वनिता शर्मा देखील शीझानच्या घरी जायच्या. परंतु शीझानबरोबर ब्रेकअप झाल्यानं तर तुनिषा खूप दुःखी असायची. ती सतत रडायची’
शीझानच्या सीक्रेट गर्लफ्रेंडचा शोध सुरू
हे प्रकरण समोर आल्यानंतर पहिल्यांदा वनिता शर्मा यांनी शीझानचे एकाच वेळी अनेक मुलींशी संबंध असल्याचा आरोप केला होता. शीझानच्या व्हॉट्सअॅप चॅटमध्ये पोलिसांना त्याच्या सीक्रेट गर्लफ्रेंडबद्दल समजलं आहे. आता पोलीस ही मुलगी नेमकी कोण आहे, याचा शोध घेत आहेत. ही मुलगी नेमकी कोण आहे, याचा अद्याप उलगडा झालेला नाही. परंतु पोलिसांच्या मते ज्या दिवशी म्हणजे २४ डिसेंबर रोजी तुनिषानं आत्महत्या केली त्याच्याआधी शीझानचं आणि तुनिषाचं या सिक्रेट गर्लफ्रेंडबद्दल बोलणं झालं होतं.
तुनिषाच्या आत्महत्येचा सीन रिक्रिएट करणार पोलीस
वळीव पोलिस आता तुनिषा शर्मा हिच्या आत्महत्येचा प्रसंग पुन्हा घटनास्थळी रिक्रिएट करणार आहेत. पालघर इथल्या मालिकेच्या सेटवरील ज्या खोलीत तुनिषानं पंख्याला लटकून आत्महत्या केली. असेही समोर आले होते की तिचा मृतदेह शीझानच्या मेकअप रुममध्ये सापडला होता. हा सर्व प्रसंग रिक्रिएट केला जाणार आहे. यावेळी शिझान खान आणि फ्लोर मॅनेजर उपस्थित राहणार आहेत. कारण हेच दोघंजण होते त्यांनी आत्महत्येनंतर तुनिषाला पहिल्यांदा पाहिलं होतं.
शीझान-तुनिषाचे फोन जप्त
तुनिषाला आत्महत्येला प्रवृत्त केल्याचा आरोप तिच्या आईनं शीझानवर करत त्याच्यावर गुन्हा नोंदवला. त्यानतंर शनिवारी रात्री शीझानला अटक करण्यात आली होती. त्याला सुरुवातीला ४ दिवसांची पोलीस कोठडी सुनावण्यात आली होती. त्यानंतर शीझानची पोलीस कोठडी ३० डिसेंबरपर्यंत वाढवण्यात आली आहे. वसई न्यायालयाच्या निर्णयानंतर शीझान पोलीस कोठडीत आहे. दरम्यान पोलिसांनी तुनिषा आणि शीझान यांचे मोबाईल फोन जप्त केले आहेत.
सीक्रेट गर्लफ्रेंडसोबत केलेले चॅट
दरम्यान तुनिषाचा फोन अध्याप अनलॉक झालेला नाही. तर शीझानचा फोन अनलॉक करण्यात आलाआहे. व्हॉट्अॅप चॅटची २५० ते ३०० पानांची फाईल्स तयार झाली असून हे चॅट तुनिषा आणि शीझानमधील आहे. शीझान आणि तुनिषाच्या आईचेही यात चॅट आहेत. पोलिसांनी दावा केला आहे की, यातील अनेक चॅट शीझाननं डिलीट केले आहेत. हे चॅट शीझान आणि त्याच्या त्या सीक्रेट गर्लफ्रेंडमधले असू शकते. हे चॅट मिळवण्याचा प्रयत्न पोलिसांकडून सुरू आहे.