रडून रडून तुनिषाच्या आईची बिकट अवस्था
एकीकडे तुनिषा तिची स्वप्न साकार करण्यासाठी टेलिव्हिजन इंडस्ट्रीमध्ये नशीब आजमावत होती, तर दुसरीकडे तिने असे टोकाचे पाऊल उचलत मृत्यूला कवटाळले. तिच्या आईसाठी हे अत्यंत दु:खदायक होते. तुनिषा पार्थिव फुलांनी सजलेल्या अँब्युलन्समधून मीरारोड याठिकाणी असणाऱ्या स्मशानभूमीत आणण्यात आले. याच अँब्युलन्समध्ये तुनिषाची आई वनिता शर्मा आणि कुटुंबातील इतर सदस्यही होते. रडणाऱ्या वनिता शर्मांना सांभाळणं तुनिषाच्या कुटुंबीयांनाही कठीण जात होतं.
शीझानच्या बहिणींनीही घेतले अंत्यदर्शन
तुनिषाचे पार्थिव स्मशानभूमीत पोहोचल्यानंतरही तिच्या आईचे रडू थांबत नव्हते. त्यांच्या रडण्याने तिथे उपस्थित सर्वांच्यात काळजात चर्रर होत होते. लोकांनी वनिता शर्मांना सांभाळण्याचा प्रयत्न केला, पण त्यांच्या डोळ्यातील आसवं थांबण्याचे नाव घेत नव्हते. साश्रू नयनांनी त्या आपल्या लाडक्या लेकीला शोधत होत्या. तुनिषाला निरोप देण्यासाठी शिवीन नारंग, अवनीत कौर, अश्नूर कौर, अब्बास-मस्तान यांच्यासह अनेक सेलिब्रिटी पोहोचले होते. प्रत्येकाच्या डोळ्यात अश्रू होते. या प्रकरणात ज्याच्यावर आरोप ठेवण्यात आले आहेत त्या शीझानच्या बहिणीही अभिनेत्रीला अखेरचा निरोप देण्यासाठी पोहोचल्या होत्या. फलक नाज आणि शफाक नाज या शीझानच्या बहिणींशी तुनिषाचे चांगले संबंध होते.
मुखाग्नी दिल्यानंतर कोसळली तुनिषाची आई
तुनिषाच्या पार्थिवावर अंत्यसंस्कार करण्यात आले आणि त्यानंतर मुखाग्नी देण्यात आला, त्यावेळी वनिता शर्मा बेशुद्ध होऊन कोसळल्या. त्यानंतर उपस्थितांनी त्यांना सांभाळत शुद्धीवर आणण्याचा प्रयत्न केला. मात्र त्यांचा आक्रोश पाहून प्रत्येकाचे मन सुन्न झाले होते. प्रत्येकाच्या डोळ्यातून अश्रू वाहत होते. अवघ्या २० वर्षांच्या तुनिषाने असे टोकाचे पाऊल उचलल्याने कुटुंब आणि मित्रपरिवारातील प्रत्येकाच्या पायाखालची जमीन सरकली आहे. नेहमी हसतमुख असणारा चेहरा आज शांत झाल्याने अनेकांचा या घटनेवर विश्वास बसत नव्हता.
तुनिषाला धोका देत होता शीझान?
तुनिषा ‘अली बाबा: दास्तान-ए-काबुल’ या टीव्ही शोमध्ये शीझानसोबत काम करत होती. याठिकाणी काम करताना दोघेही एकमेकांच्या प्रेमात पडले होते. १५ दिवसांपूर्वी तुनिषा आणि शीझानचे ब्रेकअप झाले होते, त्यानंतर तुनिषा अत्यंत त्रस्त होती. पोलिसांनी दिलेल्या माहितीनुसार, शीझानसोबत ब्रेकअप झाल्याचे तुनिषाने तिच्या आईला सांगितले होते. तुनिषाने शीझानच्या फोनमधील काही चॅट वाचले होते, त्यावरुन शीझान तिला धोका देत असल्याचे तिला समजले. मात्र शीझानने पोलिसात दिलेल्या जबाबात कोणत्याही मुलीशी अफेअर असण्याबाबतचे वृत्त फेटाळले आहे.
लेकीचा मृतदेह पाहून पायातील त्राणच गेले
दरम्यान सोमवारी तुनिषाचे कुटुंबीय तिचा मृतदेह पाहण्यासाठी रुग्णालयात गेले असताना तेव्हाही तिच्या आईची अवस्था अत्यंत बिकट होती. रिपोर्ट्सनुसार, तुनिषाचा मृतदेह पाहून वनिता शर्मा बेशुद्ध होऊन कोसळल्या. त्या पूर्णपणे कोलमडल्या होत्या आणि त्यांची शुद्ध हरपली. रडून रडून त्यांची अवस्था बिकट झाली होती, त्यांनी नीट चालताही येत नव्हते. त्यांचे कुटुंबीय वनिता यांचा हात पकडून चालताना दिसले, त्यांना स्वत:हून चालायलाही जमत नव्हते.